 | |
| Math | nant  |
|---|---|
| Daearyddiaeth | |
| Sir | Gwynedd |
| Gwlad |  Cymru |
| Cyfesurynnau | 52.917172°N 4.28459°W |
 | |
Afon yng Ngwynedd yw Afon Dwyfach. Ei hyd yw tua 8 milltir. 'Dwyfech' oedd yr hen ffurf ar yr enw, a chymerodd y bardd Morus Dwyfech (Morus ap Dafydd ab Ifan ab Einion: bl. 1523–1590) ei enw barddol ohoni.
Tardda'r afon mewn cors eang ym mhlwyf Clynnog nepell o Fwlch Derwin. Llifa i gyfeiriad y de heibio pentrefi bychain Bryncir, Glan Dwyfach, a Rhoslan. Rhed yr A487 ar hyd ei glan ddwyreiniol rhwng Clynnog Uchaf a Glan Dwyfach.
Tua milltir o'r môr mae Afon Dwyfor yn ymuno â hi, ychydig cyn iddi gyrraedd y môr i'r de o bentref Llanystumdwy ac i'r gorllewin o dref Cricieth, gan aberu ym Mae Tremadog.
