Alisa Klejbanova

L’Alisa Mikhaelovna Kleybanova (Mósca, 15 ad Luj dal 1989, Алиса Михайловна Клейбанова in Rus) l'è na tenìsta rusa prufesiunìsta da 'l Agóst dal 2003. L'è élta 181 cm e la péśa 72 chilo.

L'è stada la nùmar vint dal mónd al 21 ad Favràr dal 2011. La dróa al bras dèstar e la tira 'l arvèrs, ch'a sarés pò al sò cōlp preferî insém a 'l servìsi, a dū maṅ.

In dla sò caréra l'à vins dū tìtui WTA (in dal 2010) e déś ad qvéi ITF. In dal 2008 l'è rivàda in di utàṿ a Wimbledon e pò l'à fat cumpàgn 'l an dòp anc a gl'Australian Open.

La rusa la taca la sò caréra a la granda śugànd in dal 2003 tri turnèo ITF, vinsénd un tìtul e pardénd na finàl a Madrid. In dal 2004 la tōś part cun na carta salvàdga a 'l turnèo WTA 'd Indian Wells, da nùmar 572 dal mónd, e lè la bat subìt la nùmar 58 dal ranking, la cruàta Jelena Kostanić Tošić. In dal secónd tùran invéci la céd a l'Anna Smashnova par 4-6 0-6. In Avrìl la riva in finàl in d'l ITF ad Jackson, baténd anc la nùmar òṅ dal tablòṅ Shuai Peng, ma la la pèrd 6-4 2-6 4-6 cun l'Evgenia Linetskaya.

In dal 2005 la s mét in bisàca al turnèo ITF ad cà ad Mósca (al nùmar dū), dand la paga, fra gl'atri, a la Sara Errani e a la Karin Knapp. In Giapòṅ la śōga in Utóbar e Nuvémbar àtar dū ITF e la i fà suo tut dū. La sèra 'l an da nùmar 244 dal mónd.

La taca a śugàr in dal 2006 in dal qualificasiòṅ ad Pattaya City ma là la pèrd subìt da la Bethanie Mattek-Sands 3-6 2-6. In Maǵ la riva in finàl in d'l ITF ad Caśèrta baténd la francéśa Alizé Cornet ma pò la patìs un 2-6 4-6 da la Mandy Minella ma la stmana dòp la rusa la dà la paga pròpria a la lusemburghéśa in d'l ùlt'm at d'l ITF ad Campbàs dòp ch'in dal prim tùran l'iva asfaltâ 6-0 6-0 l'Andrea Petković.

In dal 2007 la taca la stagiòṅ tulénd part a soquànt ITF. A Mósca (al nùmar dū) la pèrd in semifinàl da l'Ekaterina Makarova par 5-7 4-6. Vinsénd dū ITF in Itâglia in Luj e Setémbar e òṅ in di Stat Unî in Utóbar, la rusa la gh la cava a tiràr-as dimóndi sù in clasìfica, a 'l nùmar 150.

In dal 2008 la pasa 'l qualificasiòṅ a Gold Coast e a gl'Australian Open, andànd pò sèmpar fóra a 'l secónd tùran da la Patty Schnyder 1-6 3-6 e da l'Anna Čakvetadze 3-6 4-6. Stés quèl anc a Antwerp ma chè la riva almànc in di quàrt (4-6 3-6 da la nùmar òṅ dal mónd, la Justine Henin). A Miami la fà al sò ingrès in dal tablòṅ prinsipàl faghénd fóra fàcil la Mashona Washington 6-1 6-2. La rusa la pasa pò àtar dū tùran prima ad farmàr-as cun la Vera Zvonarëva 1-6 4-6. A 'l Roland Garros la Klejbanova la cata 'l us sarâ a 'l secónd tùran da la Nadia Petrova. A Eastbourne, dòp tri tùran ad qualificasiòṅ, l’Alisa la fà fóra la Melanie South par 6-4 6-4 e l'Aravane Rezaï par 6-3 5-7 6-3 prima ad cédar 3-6 3-6 a cl'atra francéśa, la Marion Bartoli. A Wimbledon la riva in di utàṿ dand la paga prima a la Daniela Hantuchová e pò a la giapunéśa Ai Sugiyama, pardénd a la fiṅ cun la Venus Williams par 3-6 4-6. A Stanford la bat l'Elena Vesnina prima ad lasàr strada in dal secónd tùran a la śvisra Patty Schnyder. A Los Angeles, Montreal e New Haven la vins sōl na partìda pardénd invéci cun la Petra Kvitová, cun la Marion Bartoli ('sta vòlta par bandòṅ) e cun l'Ol'ga Govorcova. A gl'US Open (da nùmar trénta-quàtar dal mónd) la partìs bèṅ dand un 6-2 7-5 a la Carla Suárez Navarro ma pò la finìs mâl ciapànd un 5-7 3-6 da la Lindsay Davenport. La finìs 'l an śugànd quàtar ITF, vinsénd-an dū, e srand la stagiòṅ da nùmar trénta-tri dal mónd.

In dal 2009 la fà secónd tùran a Brisbane e a Sydney baténd la Kaia Kanepi 6-1 6-4 e la Marija Kirilenko 6-2 6-2 e pardénd cun la Tathiana Garbin 6-4 4-6 2-6 e cun l'Alizé Cornet 6-7 1-6. A gl'Australian Open la śōga invéci a la granda dand la paga a la Sofia Arvidsson 7-5 7-5, a la Stéphanie Cohen-Aloro 6-1 3-6 6-2 e a l'Ana Ivanović 7-5 6-7 6-2 par pò lasàr strada a la carta salvàdga ad cà, la Jelena Dokić, par 5-7 7-5 6-8. A Parì a 'l quèrt la céd a 'l secónd tùran a la pulàca Agnieszka Radwańska in tri sét e pò la fà 'l stés riśultâ anc a Dubai (5-7 4-6 da l'Ana Ivanović). A Miami l'è na lòta in famìja fra lē e di atri ex suviètichi. Dòp un bye l’Alisa la manda a cà la kaśàka Galina Voskoboeva 6-2 6-4 e pò anc la bielurùsa Nastas'sja Jakimava 6-3 3-6 6-4 ma in di utàṿ la patìs al śōg putènt dla Svetlana Kuznecova ch'la la bat par 6-2 6-1. A Fès la rusa la riva in semifinàl in dua la pèrd da l'Ekaterina Makarova par 2-6 1-6. A Madrid la fà 'l cōlp pigànd a 'l secónd tùran la Venus Williams par 6-3 3-6 7-5 prima ad far al valìś lē cun la danéśa Caroline Wozniacki cun al puntéǵ ad 2-6 2-6. Dòp soquànt prim e secónd tùran e un quàrt a Bùdapest (7-5 5-7 2-6 da la sà bistiàsa négra, la Patty Schnyder) la tórna a i sò livèi a Turònt in Agóst. In Cànada la rusa la fà fóra una a drē a cl'atra la śugadōra ad cà Aleksandra Wozniak par 6-4 6-4, la nùmar quìndas dal mónd Dominika Cibulková par 6-1 4-6 7-6, la francéśa Aravane Rezaï par 6-3 6-4 e la nùmar quàtar dal ranking Jelena Janković par 6-7 7-6 6-2. La céd sōl in semifinàl, dòp tri sét, a la Marija Šarapova par 2-6 6-4 4-6. In Setémbar la riva in di utàṿ a Tokyo baténd prima l'Ayumi Morita e pò la Vera Zvonarëva prima ad pèrd'r incóra cun la siberiàna par 6-2 2-6 2-6. La sèra 'l an rivànd in semifinàl a Mósca in dua però la céd 2-6 1-6 a 'lOl'ga Govorcova.

In dal 2010 in Austràglia la cata sù dū prim tùran cun al rusi Anastasija Pavljučenkova a Brisbane e Svetlana Kuznecova a Sydney, faghénd védar ch'la fà fadìga a śugàr-ag cóntar. A Melbourne la s tōś l'arvìnsida cun la Jelena Dokić, mandàda a cà subìt cun un 6-1 7-5 in sal cupét, e pò la bat anc la Sorana Cîrstea prima ad cédar a la Justine Henin in tri sét. A Parì a 'l quèrt la vèṅ batùda 7-6 6-1 da l'itagliàna Flavia Pennetta a 'l secónd tùran. In Favràr la vins finalmènt al sò prim turnèo WTA a Kuala Lumpur e la 'l fà baténd anc al rusi Alla Kudrjavceva 6-7 6-3 6-4 e Elena Dement'eva 6-3 6-2, qvésta chè in finàl. La fà 'n bèl turnèo anc a Indian Wells baténd la Cvetana Pironkova 6-7 6-3 6-1, la Kim Clijsters 6-4 1-6 7-6 e la Carla Suárez Navarro 2-6 7-6 6-4 par rivàr in di quàrt in dua la léva la bandéra biànca cun la Jelena Janković. A Miami e a Róma invéci la fà 'n pas indrē, pardénd subìt cun al Chichis Sara Errani e Roberta Vinci. A 'l Roland Garros la rusa la bat incóra l'Ana Ivanović par pò cédar a 'l tèrs tùran a la Jaroslava Švedova par 2-6 6-4 0-6. In sl'èrba la và fóra subìt a Eastbourne (6-4 5-7 2-6 da la Svetlana Kuznecova) mént'r a Wimbledon la céd a la Venus Williams a 'l tèrs tùran. In Agóst a San Diego la riva in di quàrt mandànd a cà la nùmar dū dal mónd, la Jelena Janković, ma pò la gh'à da pigàr-as cun la śluvàca Daniela Hantuchová par 6-2 4-6 3-6. A Montreal, New Haven e a gl'US Open la và fóra prèst par cólpa dgl'itagliàni Flavia Pennetta e Sara Errani ma in Setémbar la rusa la pōl tiràr via al turàć da 'l spumànt parchè la vins al turnèo ad Seùl, 6-1 6-3 in finàl cun la Klára Zakopalová. In Utóbar l’Alisa la pèrd a 'l secónd tùran a Pechîn (1-6 4-6 da la Na Li) e a 'l tèrs tùran a Mósca (1-6 3-6 da la Viktoryja Azaranka) ma chè almànc la bat la Lucie Šafářová e la Sara Errani.

La rusa la taca al 2011 cun un prim tùran a Brisbane ma pò la và a la granda a Sydney in dua la dà la paga a la Francesca Schiavone 6-7 6-1 6-2, a la María José Martínez Sánchez 6-2 6-4 e a la Dominika Cibulková 6-3 5-7 6-2 e pò la céd sōl par 6-4 3-6 6-7 a la nùmar tri dal mónd Kim Clijsters, pò vinsidōra di Australian Open da lè a pôc. Al 21 ad Favràr la riva a èsar la nùmar vint dal mónd (al sò ranking più bèl) dòp i quàrt pardû in Dubai cun la Flavia Pennetta. A pâr ch'a sia rivâ par lē al mumènt più bèl dla sò caréra ma a n è briśa acsè. La taca a pèrdar prèst in di turnèo (a Miami cun l'Ekaterina Makarova 5-7 3-6, a Charleston cun la Christina McHale 1-6 0-6). A Madrid e a Róma la và fóra a 'l secónd tùran, pardénd da la Roberta Vinci e da la Shahar Peer, pò ad lē a n sà più gnint, cun la rusa ch'la sa scanśèla da i turnèo dal Roland Garros e ad Wimbledon. Al 15 ad Luj, al dè dal sò cumpleàn, la fà savēr in sal sit uficiàl dla WTA e anc in sal suo 'd avér-ag al linfòma 'd Hodgkin e ad cunseguénsa 'd èsar custréta a suspéndar la sò caréra par curàr-as da 'l càncar.

La próa a tùrnàr a śugàr na prima vòlta in dal 2012 a Miami, quànd la pasa 'l prim tùran cun la Johanna Larsson prima ad farmàr-as cun la Marija Kirilenko par 6-7 3-6, ma 'l è 'n fōg ad paja. Finalmènt i dutōr i gh daṅ via libra in dal 2013 e lē la s arbàsa a śugàr in soquànt ITF americàṅ a partìr da Maǵ. La rusa la in vins òṅ e in 'n àtar la riva in finàl. In dal tèrs, śugâ in Luj, la riva in di quàrt parténd da 'l qualificasiòṅ.

• (EN) (RU) Al sò sit uficiàl
• (EN) La sò schéda in sal sit dla WTA