Back أليسون ريسك Arabic اليسون ريسك ARZ Алисън Риск Bulgarian Alison Riskeová-Amritrajová Czech Alison Riske-Amritraj Danish Alison Riske-Amritraj German Alison Riske-Amritraj English Alison Riske Spanish آلیسون ریسک Persian Alison Riske Finnish
|
C'l artìcul chè 'l è scrit in
Miranduléś |
L’Alison Riske (Pittsburgh, 3 ad Luj dal 1990) l'è na tenìsta americàna, prufesiunìsta da 'l 2009. L'è élta 175 cm e la péśa 66 chilo. La dróa al bras dèstar e la tira 'l arvèrs a dū maṅ. La stà a Atlànta.
In dla sò caréra l'è rivàda a èsar la nùmar sinquànta-tri dal mónd al 13 ad Śnar dal 2014. L'à vins siē turnèo ITF.
Caréra
A quatórd'ś an la śóga 'l qualificasiòṅ a cà sua, in d'l ITF ad Pittsburgh, ma la pèrd da l'Ol'ga Alekseevna Pučkova par 5-7 1-6. La gh próa anc 'l an dòp e 'l an dòp incóra ma a n gh'è gnint da far. In dal 2007 la tōś part a 'l qualificasiòṅ di US Open in dua la bat la Sorana Cîrstea par 6-2 7-6 ma pò la fà 'l valìś cun la Julie Ditty par 2-6 1-6.
In dal Maǵ dal 2009 la riva in semifinàl in d'l ITF da sinquànta-mila dòlar 'd Indian Harbour Beach e pò la cuntìnua bèṅ abàsta cun na finàl a Hilton Head e na semifinàl a Boston e a Atlànta, tut tri turnèo ITF americàṅ. In Utóbar la vins al tìtul ITF ad Troy in dua l'è bòna ad bàtar, lung la strada, la Jamie Hampton, l'Anna Tatishvili, la Madison Brengle e la Christina McHale, qvésta chè in finàl par 6-4 2-6 7-5. La sèra 'l an a la puśisiòṅ 222 dal mónd.
.jpg)
In dal 2010 la s fà nutàr a Birmingham, turnèo WTA ingléś, in dua la bat la Sandra Záhlavová par 7-6 4-6 6-0, l'Aleksandra Wozniak par 6-2 6-4, l'Anna Čakvetadze par 4-6 7-5 6-1 e la Yanina Wickmayer par 6-7 6-4 6-3 prima ad cédar in semifinàl a la Marija Šarapova par 2-6 6-4 1-6. In Setémbar e in Utóbar la śóga quàtar finàli ITF a Saguenay (Cànada), a Barnstaple (Régn Unî), a Joue-Les-Tours (Frància) e a San Raflèṅ (Frància) pardénd cun la Rebecca Marino par 4-6 7-6 6-7 e vinsénd cun la Johanna Larsson par 6-2 6-0, cun la Vesna Dolonc par 5-7 6-4 6-1 e cun l'Urszula Radwańska par 6-4 6-2. L'americàna la mònta sù a 'l 118śum pòst dal ranking dal fémni.
La taca la stagiòṅ 2011 pardénd in dal qualificasiòṅ ad Brisbane cun la Vania King e a 'l prim tùr'n a Melbourne da la Svetlana Kuznecova par 3-6 2-6. In Maǵ e Śugn la riva in finàl e in semifinàl a Indian Harbour Beach (tèra) e a Nottingham (èrba) e acsè la mùcia sù da piò ad sènt punt bòṅ par la sò clasìfica rivànd a èsar la nùmar sènt-sinc dal mónd. In dal WTA ad Birmingham la pèrd in di quàrt da la Daniela Hantuchová par 2-6 4-6 mént'r a Wimbledon la pòrta via 'n sét a la nùmar tri dal mónd, la Vera Zvonarëva, ma la pèrd listés a 'l prim tùran. In Utóbar e in Nuvémbar la s mét in bisàca 'l ITF ad Joue-Les-Tours e anc qvél ad Nantes ma in tut al manéri la finìs pèś 'l an crudànd śò a la puśisiòṅ 135 dal mónd.
In dal 2012 la cata incóra subìt la Svetlana Kuznecova pardénd-ag a 'l prim tùran a Auckland par 3-6 2-6 mént'r a Melbourne invèci l'è l'Urszula Radwańska a far-ag far al valìś dòp ch'la s éra qualificàda baténd l'Aleksandra Panova. La stagiòṅ la n và minga bèṅ, la n pasa mai un prim tùran in di turnèo WTA e da spés la n pasa gnanc 'l qualificasiòṅ, e difàti la ślìcia śò a 'l 179śum pòst.
L’Alison la gh'à da spetàr al Luj dal 2013 par far incóra la vóś grôsa e la 'l fà in sl'èrba ad Birmingham in dua la riva in semifinàl baténd la Sabine Lisicki e pardénd pò in tri sét da la Daniela Hantuchová. C'n al tèrs tùr'n ad Wimbledon (2-6 3-6 da la Kaia Kanepi), l'americàna la pasa da 'l 167śum pòst a 'l 107śum pòst. In dla mità ad Luj la pòrta a cà 'n àtar riśultâ bòṅ in d'l ITF ad Portland, cun la finàla pardùda cun la giapunéśa Kurumi Nara. In Agóst, dòp avér pasâ 'l qualificasiòṅ a New Haven avénd-ag la méj cun l'Eleni Daniilidou, l'Irina-Camelia Begu e la Yanina Wickmayer, la fà fóra la Stefanie Vögele e pò la Riske la và in a risć ad mandàr a cà anc la Petra Kvitová ma la nùmar nóṿ dal mónd la la scampa vinsénd sèg par 7-6 4-6 6-3. Ma la céca la n pōl far gnint a gl'US Open quànd l’Alison la la sćiànca a 'l tèrs tùran par 6-3 6-0 dòp avér dâ la paga anc a la Cvetana Pironkova 6-3 6-3 e a la Mona Barthel 6-4 6-2. Incóra na vòlta l'è la Daniela Hantuchová a dar-'g un daspiaśēr baténd-la par 6-3 5-7 6-2 in di utàṿ. A 'ndàr a la fiṅ d'l an la mét in fila dū quàrt in di ITF ad Poitiers e a Barnstaple e na semifinàl in qvél 'd Albuquerque e acsè la riva a èsar la nùmar sinquànta-sèt dal ranking.