Angelique Kerber

L’Angelique Kerber (Bréma, 18 ad Śnar dal 1988) l'è na tenìsta tedésca cun pàdar pulàc. La s è stablìda a Kiel in dal nòrd dla Germâgna. L'è élta 173 cm, la péśa 68 chilo e l'è bòna 'd dascór'r in tedésc, in ingléś e in pulàc. La dróa 'l bras sinìst'r e la tira 'l arvèrs a dū maṅ.

Vinsénd gl'Australian Open al 30 ad Śnar dal 2016 la s è purtàda a 'l nùmar dū dal mónd, al sò best ranking. In dla sò caréra l'à vins anc sèt tìtui WTA pardénd invéci ùndas finàli.

In di àtar Gran Slam l'è rivàda in semifinàl a gl'US Open in dal 2011 e a Wimbledon in dal 2012, mént'r a 'l Roland Garros al sò riśultâ più bèl 'l è 'n quàrt ad finàl in dal 2012.

L’Angelique la mōṿ i sò prim pas in di turnèo WTA in dal 2003. In dal 2007 la śōga soquànti partìdi in di Gran Slam ma la và sèmpar fóra a 'l prim tùran. In dal 2010 la riva in finàl in dal turnèo ad Bugutà ma la pèrd cóntar la Mariana Duque Mariño.

In dal Setémbar dal 2011 la s fà cgnósar in tut al mónd quànd la riva in semifinàl a i US Open baténd, fra gl'atri, l'Agnieszka Radwańska e la Flavia Pennetta a i quàrt, ma pò la pèrd cóntar la Samantha Stosur par 6-3 2-6 6-2.

A pâr un fōg ad paja ma a n è briśa acsè parchè la Kerber la gh dà déntar a 'l inìsi dal 2012 cun atri dū semifinàli a Auckland (śbatùda fóra par la Flavia Pennetta) e Hobart. A Parì la vins al sò prim turnèo cóntar la Marion Bartoli par 7-6 5-7 6-3 e la gh la cava a èsar la nùmar vint-a-dū dal mónd. In Mars a riva n'atra semifinàl par lē ma 'sta vòlta in un Premier Mandatory, qvél 'd Indian Wells. Chè la bat la sò prima top-10, la Na Li, prima ad lasàr-'g al péni cóntar la nùmar òṅ dal mónd, la Viktoryja Azaranka, par 6-4 6-3. In Avrìl la vins 'n àtar tìtul, in Danimàrca, mulànd dū 6-4 a la Caroline Wozniacki ch'la śugàv' in cà. A Róma la céd sōl a la Marija Šarapova in semifinàl e acsè, cun i punt muciâ sù in Itâglia, la dvénta la nùmar déś dal mónd. A 'l Roland Garros la cata in sla sò strada in di quàrt la Sara Errani e la fà sù 'l valìś. A gh và méj a Wimbledon in dua la bat la Kim Clijsters par pò lasàr strada a l'Agnieszka Radwańska in semifinàl. A la Rogers Cup dal 2012 la vèṅ batùda a 'l tèrs tùran par la Roberta Vinci. A Cincinnati la riva in finàl baténd prima la Serena Williams in di quàrt e pò la Petra Kvitová in semifinàl, ma la n vins minga 'l tìtul ch'al finìs in dal maṅ dla cinéśa Na Li par 1-6 6-3 6-1. A gl'US Open l'incróś' incóra la Sara Errani in dal quàrt tùran e la pèrd. La finìs 'l an in tut i caś a 'l sèst pòst.

In dal 2013 la fà gl'utàṿ a gl'Australian Open (5-7 4-6 da l'Ekaterina Makarova) pò la riva in semifinàl a Indian Wells cuma 'l an prima, anc par via 'd 'n infurtùni dla Samantha Stosur in di quàrt, ma pò la pèrd cóntar la Caroline Wozniacki 7-5 a 'l tèrs. Al méś dòp la pèrd la finàl dal turnèo mesicàṅ ad Monterrey cun l'Anastasija Pavljučenkova par 6-4 2-6 4-6. In Avrìl invéci la rusa la gh pèrd a Stucàrda ma pò l'è n'atra rusa, la Marija Šarapova, a 'vér la méj sèg in semifinàl par 6-3 2-6 7-5. In Maǵ la tedésca la riva in di quàrt a Madrid (3-6 1-6 da l'Ana Ivanović) e in di utàṿ a 'l Roland Garros (4-6 6-4 3-6 da la Svetlana Kuznecova). In Agóst a Cincinnati la bat armuntànd la Karin Knapp e pò l'Alisa Klejbanova ma in di utàṿ la lasa strada a la Na Li e la fà cumpàgn anc a gl'US Open pardénd cun la Carla Suárez Navarro. In Setémbar la śōga dimóndi bèṅ a Tokyo in dua la bat l'Ana Ivanović, l'Agnieszka Radwańska e la Caroline Wozniacki prima 'd céd'r in finàl cun la Petra Kvitová par 2-6 6-0 3-6. In Utóbar a Linz i gh dànan na carta salvàdga par parmét'r-ag, vinsénd, ad muciàr di punt abàsta par psēr tōr part a i WTA Championships. La tedésca la n falìs minga e la s pòrta a cà 'l tìtul baténd par 6-4 7-6 l'Ana Ivanović. A Ìstanbul però la n pasa minga 'l giròṅ parchè la bat sōl l'Agnieszka Radwańska e minga la Serena Williams e gnanc la Petra Kvitová.

In dal 2014 la pèrd la finàla 'd Sydney da la qualificàda Cvetana Pironkova, 4-6 4-6 al puntéǵ. A gl'Australian Open l'è la Flavia Pennetta a mandàr-la fóra in di utàṿ. La tedésca la pèrd pò n'atra finàl a Doha 'sta vòlta chè cun la Simona Halep par 2-6 3-6. A Indian Wells invéci la fà fagòt subìt cun la María-Teresa Torró-Flor mént'r a 'l Roland Garros la riva almànc in di utàṿ ma chè l'Eugenie Bouchard la la spiàna par 6-1 6-2 e pò la vins'rà sèg anc a Wimbledon in di quàrt. In dal mèś n'atra finàla butàda a gl'urtìghi par l’Angelique, 3-6 6-3 5-7 da la Madison Keys. Cla maledisiòṅ la cuntìnua anc a Stanford (6-7 3-6 da la Serena Williams). A gl'US Open la patìs un 1-6 5-7 a 'l tèrs tùran da la Belinda Bencic, mént'r a Wuhan l'è l'Elina Svitolina a bàt'r-la in di quàrt par 6-4 7-6. In Setémbar la pasa dū tùr'n a Pechîṅ, pò la céd in tri set a la Svetlana Kuznecova. A la fiṅ d'l an la śōga la finàl dla Fed Cup par la Germâgna ma la la pèrd, acsè cuma i sò dū singulàr, cun la Repùblica Céca.

La Kerber la vèra 'l 2015 faghénd tri turnèo in Austràglia: Brisbane, Sydney e gl'Australian Open a Melbourne e la mùcia sù un quàrt (6-4 5-7 3-6 da l'Elina Svitolina), na semifinàl (3-6 2-6 da la Karolína Plíšková) e 'n prim tùran (4-6 6-0 1-6 da l'Irina-Camelia Begu). A Anvèrsa la ciàpa subìt la paga da la qualificàda Francesca Schiavone ch'la l'asfalta par 6-1 6-1. A Dubai l'è invéci la Flavia Pennetta a vìnsar sèg in di utàṿ par 6-2 3-6 6-1. I rìvan pò dū brut prim tùr'n a Doha e a Indian Wells anc s'a s pōl dir ch'la tedésca l'àppia pascâ mâł in di surtéǵ bcand prima la Viktoryja Azaranka e pò la Sloane Stephens. A Miami la bat l'Heather Watson ma la pèrd dòp cun la Svetlana Kuznecova ma a s pōl dir ch'al sò mumènt nég'r al finìs lè parchè pò la vins a Charleston, dand un 6-2 4-6 7-5 a la Madison Keys, e a Stucàrda, 3-6 6-1 7-5 a la Caroline Wozniacki. In chi àtar turnèo su la tèra a l'ària vèrta però la fà sù pôc, giùst na semifinàl a Nurimbèrga. Śugànd su l'èrba ad Birmingham a riva 'n àtar tìtul c'n al vìnsidi su la Sabine Lisicki e su la Karolína Plíšková, qvésta chè batùda pò anc in dla finàl ad Stanford in Agóst. A gl'US Open la pèrd a 'l tèrs tùran da la Viktoryja Azaranka par 5-7 6-2 4-6 mént'r a Wuhan la gh'à da pigàr-'s a la Garbiñe Muguruza Blanco in semifinàl par 4-6 6-7. In Setémbar la pasa dū tùr'n a Pechîṅ, pò la céd in di quàrt a l'Agnieszka Radwańska par 1-6 4-6. La sèra 'l an cun la finàl pardùda 'd Hong Kong (6-3 6-7 1-6 da la Jelena Janković) e cun i WTA Championships in dua la n pasa minga 'l giròṅ parchè la bat sōl la Petra Kvitová, pò in finàl, e minga la Garbiñe Muguruza Blanco e gnanc la Lucie Šafářová.

In dal 2016 la sarnìs al Premier ad Brisbane par vèrar la stagiòṅ. A 'l prim tùran la và in a risć 'd andàr fóra subìt cun la Camila Giorgi ma dòp na suspensiòṅ par la piōva la vins gl'ùlt'm òt śōg ad fila e la partìda par 5-7 6-3 6-0. In séguit la bat la Madison Brengle par 6-3 6-0, l'Anastasija Pavljučenkova par 6-4 6-4 e la Carla Suárez Navarro par 6-2 6-3 ma in finàl la cata la sò bistiàsa négra, la Viktoryja Azaranka, ch'la vins sèg par la sèsta vòlta su siē, 6-3 6-1 al puntéǵ. A Sydney la n śōga mia par precausiòṅ al sò incónar dal secónd tùran cun l'Ekaterina Makarova e la và subìt a Melbourne in dua la tedésca la vins al sò prim tìtul Ślam baténd una adrē a cl'atra la Misaki Doi par 6-7 7-6 6-3 (salvànd un match point cóntar), l'Alexandra Dulgheru par 6-2 6-4, la Madison Brengle par 6-1 6-3, l'Annika Beck par 6-4 6-0, la Viktoryja Azaranka par 6-3 7-5, la Johanna Konta par 7-5 6-2 e la Serena Williams par 6-4 3-6 6-4.

• (EN) Al sò sit ufisiàł
• (EN) La sò schéda in sal sit dla WTA