Back جويا باربييري Arabic Gioia Barbieri German Gioia Barbieri English Gioia Barbieri Spanish جویا باربیری Persian Gioia Barbieri Italian Gioia Barbieri Dutch Gioia Barbieri Polish Gioia Barbieri Portuguese Барбьери, Джоя Russian
|
C'l artìcul chè 'l è scrit in
Miranduléś |
La Gioia Barbieri (Frampùla, 9 ad Luj dal 1991, a s lèś [ˈd͡ʒɔja bar'bjeɾi] in Itagliàn) l'è na tenìsta rumagnōla prufesiunìsta da 'l 2005.
La dróa al bras dèstar e la tira 'l arvèrs a dū maṅ. L'è alenàda par Giorgio Galimberti e là fà gl'alenamènt a San Marèṅ[1]. A gh piàś lèśar, far dal còmpri, scultàr la mùśica e andàr fóra cun i amìg.
In dla sò caréra l'à purtâ siē tìtui ITF e l'è rivàda a èsar la nùmar 265 dal mónd al 4 ad Nuvémbar dal 2013.
Caréra
La rumagnóla la śóga tri incóntar in dal 2005 pardénd-i tut. In dal Luj dal 2007 l'incróśa la Camila Giorgi in dal qualificasiòṅ d'l ITF ad Rèmin e la gh pèrd par 1-6 4-6.
Dòp soquànt infurtùni, la taca a far dabòṅ in dal 2010. In Favràr la riva in semifinàl in d'l ITF ad Madrid (5-7 5-7 da la piemuntéśa Giulia Gatto-Monticone). In Śugn la s tōś l'arvìnsida sèg in di quàrt d'l ITF ad Campbàs par 6-1 6-7 6-2 ma pò la céd a la Laura Thorpe par 5-7 5-7. In Luj la s pòrta a cà 'l ITF 'd Iommla e pò la riva in di quàrt a Les Contamines-Montjoie in dua la patìs un 4-6 4-6 da l'Andrea Hlaváčková. La sèra 'l an a la puśisiòṅ 425.
In dal 2011 la vins 'l ITF ad Leimen (Baden-Württemberg). In Maǵ la próa a qualificàr-as p'r al WTA ad Róma ma la pèrd da l'americàna Varvara Lepchenko par 1-6 4-6 e pò la fà sù dū prim tùran in di ITF ad Brésa e ad Grâd cun gl'austrìachi Patricia Mayr-Achleitner e Yvonne Meusburger, tèsti ad série nùmar òṅ. In Agóst la s férma in di quàrt cun l'Annika Beck in d'l ITF 'd Ìstanbul (al nùmar sèt) par 4-6 1-6.
In dal 2012 la vins 'l ITF 'd Antàglia (al nùm'r òt). In Avrìl la bat 6-4 7-5 la sèrba Vesna Dolonc in di quàrt a Sivitavècia par pò alvàr bandéra biànca cun la Yuliya Beygelzimer par 6-3 4-6 6-7. In Luj la vins 'n àtar ITF a Viśèrba par pò andàr fóra subìt a Rebecq cun la Kirsten Flipkens par 2-6 5-7. La finìs la stagiòṅ a 'l tarśèntéśum pòst.
In dal 2013 la śóga quàt'r ITF ad fila a Antàglia, rivànd in semifinàl in dal nùmar déś. In Avrìl la pèrd in di quàrt in d'l ITF tuniśèṅ ad La Marsa cun l'Yvonne Meusburger. A Sivitavècia invéci la riva in semifinàl in dua la patìs un 1-6 5-7 da la śluvàca Anna Karolína Schmiedlová. In Agóst la fà suo dū ITF ad déś-mìla dòlar par pò rivàr in semifinàl a Sòfia (3-6 4-6 da la Kristína Kučová). In Utóbar, baténd la rusa Nina Bratčikova par 3-6 6-3 3-0 bandòṅ, la vins al sò ITF più impurtànt, qvél ad vintsìnc-mila dòlar ad Làgos.
Culegamènt estéran
Nòti
- ↑ Hurrà dópi par la Gioia Barbieri a Lagos Newsrimini.it, 26 'd Utóbar dal 2013