Back Guns N' Roses Afrikaans Guns N' Roses ALS Guns N' Roses AN غنز آن روزز Arabic جانز أند روزيز ARZ Guns N' Roses Azerbaijani قانز ان روزز AZB Guns N’ Roses Byelorussian Гънс Ен Роузис Bulgarian গানস অ্যান্ড রোজেস Bengali/Bangla

Guns N' Roses

C'l artìcul chè 'l è scrit in Miranduléś Emiliàn


«
She's got eyes of the bluest skies as if they thought of rain, I hate to look into those eyes and see an ounce of pain, her hair reminds me of a warm safe place where as a child I'd hide and pray for the thunder and the rain to quietly pass me by.»
(EN)(Sweet child o' mine, 1987)
«
La gh'à i òć di cēi più blù cuma s'i pinsìsan a la piòva, a òdi guardàr dèntar a chi òć lè e véd'r-ag na trasa ad dulōr, i sò cavìi i m ricòrdan un pòst cald e sicûr in dua a m lugarév cuma da putèṅ e a pregarév parchè al tròṅ e la piòva i s in andìsan via da mè piàn piâṅ.»
(MUD)
I Guns N' Roses versiòṅ 2006: Richard Fortus, Izzy Stradlin e Axl Rose


I Guns N' Roses (Al pistòli e al Róśi) i èṅ un grup hard rock americàṅ, fundâ a Los Angeles in dal 1985. Al lōr stîl muśicàl, la lōr manéra ad cumpurtàr-as da arvèrs e i tant cuncèrt sèmpar pîṅ fat in tut al mónd i i aṅ cuciâ sù in sla scalaróla dal sucès a cavàl di an Utànta e Nuànta, anc in dal nòstar paéś.

A partìr da 'l 1993, al grup 'l à cgnusû di brut mumènt par via di scas fra 'l cantànt Axl Rose e chi àtar cumpunènt di Guns, mandâ via tut òṅ a drē a c'l àtar par dar vita a na banda persunàla purtàda avànti da 'l sōl Axl.

I Guns N' Roses i aṅ vindû dagnóra sènt migliòṅ ad disc in tut al mónd e i èṅ stâ mis a 'l 92śum pòst di sènt artìsta più braṿ fata par Rolling Stone. Al 14 'd Avrìl dal 2012 al grup 'l è stâ sarnî par finìr in dla Rock and Roll Hall of Fame.

Biugrafìa

Gl'Inìsi

Al logo dal grup

Al grup al tōś vita in dal Mars dal 1985 miténd insém di mémbar di Hollywood Rose (al cantànt rós ad cavìi Axl Rose e al chitarìsta Izzy Stradlin) e di L.A. Guns (al chitarìsta Tracii Guns, al basìsta Ole Beich e al baterìsta Rob Gardner). Al nóm stés al n è àtar che la fuśiòṅ di nóm di grup uriginàri. I sinc i s śibìsan pò par la prima vòlta al 26 ad Mars dal 1985.

Pôc tèmp dòpa Ole al lasa al pòsta a Duff McKagan ch'al fà al sò debùt da drē a 'l quàtar còrdi 'l 11 'd Avrìl ad c'l an lè, sunànd a 'l "Radio City" 'd Anaheim (Califòrgna). Anc Tracii Guns al s in và (par mét'r incóra insém gl’L.A. Guns) e al grup al tōś acsè Slash, scutmâj ad Saul Hudson ch'al vōl dir Siléf. Chi lò al daśgnìva da i London e da i Black Sheep ma 'l iva anc bèla sunâ cun i Hollywood Rose insém a Rose e Stradlin. Soquànt méś dòp anc Gardner al fà al valìś e al grup al cata acsè in Steven Adler (nâ Michael Coletti e cun al scutmâj ad popcorn) al baterìsta ch'al mét a pòst al ròbi, cun na furmasiòṅ finalmènt fisa e prónta a catàr sù al sucès, fra i prim a sunàr al sleaze metal.

Mis sóta cuntràt da Tom Zutaut dla Geffen Recors, in dal Maǵ dal 1986 i faṅ gnir fóra in 10.000 còpi 'l EP Live ?!*@ Like a Suicide par l'etichéta UZI Suicide, cun dèntar quàtar braṅ: Reckless Life, Nice Boys, Move to the City e la cover di Aerosmith Mama Kin. Al disc al pâr un cuncèrt dal viṿ ma a n è briśa acsè parchè 'l è stâ rigistrâ in studi e al pùblic 'l è stâ śuntâ in un secónd mumènt.

«
You stole your mama's car and your daddy's plastic credit card, you're sixteen and you can't get a job, you're not goin' very far, you're always ridin' with the teachers and the police, this life is much too insane! When you, you gonna move to the city? Into the city where it all began.»
(EN)(Move to the City, 1986)
«
'T à rubâ la màchina a tò màdar e la carta ad crèdit a tò pàdar, at gh'à sed'ś an e ta n gh'la cav minga a catàr un lavōr, ta n andarà briśa luntàṅ, at finirà sèmpar in mèś a di mìstar e a di pulisiòt, in ch'la vita chè a gh'è un muć ad materìa, quànd è-la ch'at andarà in sità? in sità in dua 'l è tacâ incòsa.»
(MUD)

Appetite for Destruction e al sucès (1987-1988)

Al chitarìsta Slash cun adòs na maja di Kiss

Finalmènt al 21 ad Luj dal 1987 a véd la luś al prim àlbum dal grup, Appetite for Destruction (Apetìt par la distrusiòṅ), òṅ di più vindû dla stòria dal rock dûr cun i sò 35 migliòṅ ad còpi in dal mónd (18 in di sōi Stat Unî) e al quàrt disc ad debùt ad sèmpar in fat ad vénditi. La rivìsta Rolling Stones al 'l à mis a 'l 61śum pòst di sinc-sènt disc più bèi dla stòria.

I sìngui tirâ fóra da 'l disc i èṅ tri, tut di sucès da top ten in dal sò paéś: la rabìda Welcome to the Jungle (ch'la dascór 'd un campagnōl ch'al riva in sità e al cata la giùngla a dita 'd un barbòṅ), la dólsa Sweet Child O' Mine (a s pōl dar la canta più cgnusùda dal grup cun Slash ch'al vèra al braṅ cun òṅ di riff più famóś dla stòria dal rock) e Paradise City, ch'la partìs piàṅ e pò la s dà a la samàna. Soquànt braṅ i rìvan diretamènt da i grup ch'i gh'éran prima di Guns cuma Anything Goes di Hollywood Rose, Think About You purtàda da Izzy o la It's So Easy scrita da Duff McKagan insém a West Arkeen prima ad śuntàr-as a chi àtar.

«
I see you standin' there, you think you're so cool, why don't you just, fuck off! Ya get nothin' for nothin', if that's what ya do, turn around bitch I got a use for you, besides you ain't got nothin' better to do and I'm bored. It's so easy, easy, when everybody's tryin' to please me baby.»
(EN)(It's So Easy, 1987)
«
Ta sta lè férma, ta t créd 'd èsar figa, parchè n và't minga a far-at gusàr? Ta n gh'à gnint par gnint, se quést chè 'l è quél ch'at fà, alóra rója pril-at che mè a sò cuma druàr-at, anc parchè ta n gh'à gnint àtar ad méj da far e mè a sòṅ fiacâ. 'L è acsè fàcil, fàcil, quànd tut i próan a cuntintàr-um, putìna.»
(MUD)

I tèst dal disc i èṅ dimóndi crûd (i dascóran dal sès, dla viulénsa e dla dròga, batśànd in pîṅ al spìrit dal Rock'n'Roll) ma incóra da piò l'éra la prima cupertìna dal disc, un quàdar ad Robert Williams (ch'al n iva però minga ciapâ di bèsi p'r al sò lavōr) ch'al figuràva un móstar vulànt ch'al difénd na ragasōla ch'l iva pardû i sèns da 'n robót ch'al gh vliva far-ag viulénsa.

Dòp la prima stampàda ad 500.000 còpi andàdi a ruba, la cupertìna però la càmbia e la dróa a 'l sò pòst un tatuàǵ 'd Axl ch'al figuràva na cróś su sfónd négar cun insìma i sinc tésć di cumpunènt dal grup.

Al n éra briśa un segrét che i mémbar dal grup i s fsìsan in alóra un muć ad stupefacènt a róta 'd còl, tant che durànt un tour in Inghiltèra i i ciamàvan Lines N' Noses (Pisti e Naś) e i giurnài i dgìvan ad lōr: «I èṅ adiritùra pèś di Beastie Boys!». In cal mèntar i Guns i s faṅ i òs sunànd da spala a di grup quài Aerosmith e Rolling Stones par pò tacàr un tour da par lōr. In dal 1988 i sònan a 'l Monsters of Rock a Donington Park insém a gl'Iron Maiden e a i Kiss. Par soquànti dati al baterìsta di Cinderella, Fred Coury, al tōś al pòst ad Steven Adler ch'al s éra śbragâ na maṅ mulànd di cruc durànt na casuterìa insém a i sò cumpàgn a 'l Hyatt Regency Hotel ad Chicago.

GN'R Lies (1988-1990)

Dasfrutànd al mumènt bòṅ, al 30 ad Nuvémbar dal 1988 la Geffen Records la fà gnir fóra G N'R Lies (Al buśìi di G N'R), un disc ch'al gh'iva dèntar i quàtar braṅ ad Live ?!*@ Like a Suicide e àtar quàtar braṅ in na versiòṅ acùstica. A s trata ad You're Crazy, bèla vgnû fóra in na ciàv hard rock in Appetite For Destruction, 'd Used to Love Her (cun un tèst catìṿ in di cunfrónt ad cal dóni parchè al riturnèl al dgiva «A gh vliva bèṅ dabòṅ ma a gh'ò abû da cupàr-la, a sòṅ stâ custrét a saplìr-la sóta dū mèt'r ad tèra ma quàla lè la và adrē incóra», fagénd acsè incasàr gl'L7 ch'i aṅ pò arbaltâ al dascōrs su chi masć in dla sò cover Used to Love Him), dal sìngul Patience e dla canta finàla One In A Million. Ch'la trasa lè la dascurìva in na manéra cruda d'l impàt patî da 'n baghét ad la pruvìnsa dl'Indiàna (Axl) ch'al rivàva a Los Angeles ma l'è stàda batśàda rasìsta in di cunfrònt di négar e di fnòć, tant che i Guns i ìvan tòlt la deciśiòṅ da n sunàr-la briśa da 'l viṿ.

«
Police and niggers, that's right, get out of my way, don't need to buy none of your gold chains today, I don't need no bracelets, clamped in front of my back, just need my ticket, 'til then, won't you cut me some slack? You're one in a million, yeah, that's what you are, you're one in a million babe, you're a shooting star, maybe someday we'll see you before you make us cry, you know we tried to reach you but you were much too high! Immigrants and faggots, they make no sense to me, they come to our country and think they'll do as they please like start some mini Iran or spread some fuckin' disease.»
(EN)(One In A Million, 1988)
«
Pulisiòt e nigràs, a iv capî bèṅ, fóra dal bali, a n gh'ò minga biśógn ad ninsùna dal vòstri cadnìni 'd òr, i n m vōlan mia di brasalét, p'r èsar pò tòlt p'r al cûl apéna a m vòlt indrē, a m vōl sōl un bijét, intànt ch'a 'spèt, vliv dar-gh un taj? At sē òṅ còntra 'n migliòṅ, sè, 'l è quél ch'at sē, at sē òṅ còntra 'n migliòṅ teśôr, at sē na stéla ch'la casca śò, a gh'è 'l caś ch'at vadrém un dè, prima ch'at s farà piànśar, ta 'l sà ch'a-j-ém pruâ a gnir da tè, ma tè at sēr tròp in élt! Imigrànt e buśòṅ i n gh'aṅ minga sèns par mè, i vènan in dal nòstar paéś e i crédan ad psér far incòsa cuma s i dìsan vita a di Iran pìculèṅ o i stràmnan in gir dal malatìi dal cas.»
(MUD)
Al basìsta Duff McKagan
Buckethead cun la mascra e 'l séć in cô

In tut al manéri, i "arvèrs" Guns, cun tut i sò stravìsi, i n fàvan pròpria minga dascórar bèṅ ad lōr, tant che la Geffen, par dir-'n una, l'è stada custréta a tiràr gl'uréci a Slash e Duff parchè, drugâ pódag, i ìvan uféś pēś al pùblic durànt i American Music Awards dal 1990. Ma anc Axl 'l éra incasâ négar. Durànt un cuncèrt dal 1989 a 'l Los Angeles Coliseum al cantànt 'l iva dit che quàl lè al sarés stâ 'l ùltim cuncèrt di Guns N' Roses parchè a tròp di mémbar dal grup a gh piaśìva balàr cun Mr. Brownstone (da 'l tìtul dna canta 'd Appetite For Destruction ch'la dascurìva dla dròga). Steven, Slash e Izzy i decìdan acsè ad far-as curàr.

Cumpunènt

Quéi 'd adès

  • Axl Rose - vóś • piàṅ (1985-incō)
  • Dizzy Reed - tastéri (1990-incō)
  • Chris Pittman - tastéri (1998-incō)
  • Richard Fortus - chitàra (2002-incō)
  • Ron Thal - chitàra (2006-incō)
  • DJ Ashba - chitàra (2009-incō)
  • Tommy Stinson - bas (1998-incō)
  • Frank Ferrer - baterìa (2006-incō)

Quéi vèć

  • Tracii Guns - chitàra (1985)
  • Slash - chitàra (1985-1996)
  • Izzy Stradlin - chitàra (1985-1991)
  • Gilby Clarke - chitàra (1991-1994)
  • Paul Tobias - chitàra (1994-2002)
  • Buckethead - chitàra (2000-2004)
  • Robin Finck - chitàra (1996-1999 e 2000-2008)
  • Ole Beich - bas (1985)
  • Duff McKagan - bas (1985-1997)
  • Rob Gardner - baterìa (1985)
  • Steven Adler - baterìa (1985-1990)
  • Matt Sorum - baterìa (1990-1997)
  • Josh Freese - baterìa (1997-1999)
  • Bryan Mantia - baterìa (2000-2006)

Discugrafìa

Àlbum

Dal Viṿ

Racòlti

EP

Vìddeo

Videoclip

  • 1987 - It's So Easy
  • 1987 - Welcome to the Jungle
  • 1988 - Sweet Child O' Mine
  • 1989 - Paradise City
  • 1989 - Patience
  • 1991 - You Could Be Mine
  • 1991 - Don't Cry
  • 1991 - Live and Let Die
  • 1992 - November Rain
  • 1992 - Knockin' on Heaven's Door
  • 1992 - Yesterdays
  • 1992 - The Garden
  • 1993 - Dead Horse
  • 1993 - Bad Apples
  • 1993 - Garden of Eden
  • 1994 - Estranged
  • 1994 - Since I Don't Have You

DVD

  • 1998 - Welcome to the Videos
  • 1999 - Use Your Illusion I
  • 1999 - Use Your Illusion II

Culegamènt estéran

Developed by StudentB