Jamie Hampton

La Jamie Hampton (Francfòrt, 8 ad Śnar dal 1990) l'è na tenìsta americàna, prufesiunìsta da 'l Setémbar dal 2009. L'è nada in Germâgna perchè sò pàdar, militàr ad mistēr, al lauràva là in alóra. Sò màdar invéci la daśvèṅ da la Curèa dal Sud.

L'è élta 173 cm e la péśa 68 chilo. La dróa al bras dèstar e la tira 'l arvèrs a dū maṅ. La stà a Auburn in dal stat dl'Alabàma.

In dla sò caréra l'è rivàda a èsar la nùmar vint-sinc dal mónd al 24 ad Śugn dal 2013. L'à vins in tut sinc tìtui ITF.

In dal 2010, dòp avér mancâ p'r un pēl al qualificasiòṅ a 'l turnèo ad Stanford, la gh la cava invéci a pasàr-i a San Diego pardénd però subìt par 3-6 4-6 cun la Melanie Oudin. A Cincinnati i gh dànan na carta salvàdga ma lē la n la dasfrùta briśa pardénd 4-6 2-6 da la Sara Errani. In dal 2011 la mét in fila sōl di prim tùran, in tut 'l an la vins sōl na partìda in di turnèo WTA, qualificasiòṅ a part, a Miami cóntar la nùmar 173 dal mónd Ajla Tomljanović.

In dal 2012, baténd la Kirsten Flipkens, la gh la cava a pasàr al qualificasiòṅ a gl'Australian Open. Chè la bat la Mandy Minella 6-1 6-1 prima 'd èsar sćiancàda 0-6 1-6 da la Marija Šarapova. In Favràr la śōga anc al turnèo ad Memphis dòp avér batû la Nastassja Burnett in dal qualificasiòṅ; anc chè la fà secónd tùran (4-6 3-6 da la Vera Duševina). A Indian Wells la fà dimóndi strada baténd via via la Polona Hercog 6-0 6-1, la Jelena Janković 6-4 6-3 e la Jarmila Gajdošová 6-2 6-7 6-2. In sal più bèl l'è custréta a dar-ag sù cun l'Agnieszka Radwańska quànd i ér'n un sét para. A Charleston la bat la Sloane Stephens prima ad pèrdar da la nùmar sinc dal mónd Samantha Stosur. A Wimbledon la gh la cava a mandàr a cà la Daniela Hantuchová prima ad far al valìś lē cun la śugadōra ad cà, l'Heather Watson. Da Agóst in avànti la pèrd a 'l prim tùran da la Marion Bartoli a gl'US Open, a 'l secónd tùran da l'Ekaterina Makarova a Seùl, a 'l tèrs tùran da l'Agnieszka Radwańska a Tokyo e in di quàrt a Uśàka (2-6 4-6 da la Samantha Stosur). La sèra 'l an da nùmar stant'òṅ dal mónd.

Al 2013 al s vèra bèṅ par lē parchè la gh la cava a rivàr in semifinàl a Auckland (6-7 6-7 da l'Agnieszka Radwańska) e a 'l tèrs tùran a Melbourne (4-6 6-4 2-6 da la Viktoryja Azaranka, nùmar òṅ dal mónd e vinsidōra pò dal turnèo). In Favràr la śōga p'r i Stat Unî la Fed Cup a Rìmin. La Sara Errani la gh lasa sōl al briśi baténd-la 6-2 6-1. Cun la Roberta Vinci la cumbàt sōl in dal secónd sét pardénd pò listés 2-6 6-4 1-6. La tórna a śugàr in dal sircùit WTA a Memphis in dua la riva in di quàrt (5-7 2-6 da la Marina Eraković). A Indian Wells, prima ad cédar a la Urszula Radwańska, la manda a cà la Bethanie Mattek-Sands 5-7 6-3 6-1 e la Su-Wei Hsieh 6-3 6-3. Dòp un secónd tùran a Miami, la taca dimóndi mâl la stagiòṅ in sla tèra pardénd a 'l prim tùran a Charleston e a n pasànd minga al qualificasiòṅ a Madrid e a Róma. Tucâ al fónd, la Hampton la s dà na mòsa a partìr da 'l turnèo ad Bruxelles in dua la manda a cà al śugadōri ad cà Yanina Wickmayer e Kirsten Flipkens e l'itagliàna Roberta Vinci 5-7 6-3 7-5, pardénd pò in semifinàl da la Kaia Kanepi. A 'l Roland Garros la dà adòs a 'l céchi Lucie Šafářová e Petra Kvitová ma a 'l quàrt tùran la vèṅ misa a 'l sò pòst da la Jelena Janković 0-6 2-6 rivànd in tut i caś a èsar la nùmar quarànta-dū dal mónd. La taca la stagiòṅ in sl'èrba cun un secónd tùran a Birmingham (6-2 3-6 6-7 da la Madison Keys). In Śugn la riva par la prima vòlta in caréra in finàl in un turnèo WTA a Eastbourne miténd in riga una a drē a cl'atra l'Agnieszka Radwańska 7-6 6-2, la Su-Wei Hsieh 6-4 7-6, la Lucie Šafářová 3-6 7-6 6-4 e la Caroline Wozniacki 6-7 7-5 6-3. In d'l ùlt'm incóntar la n pōl però far gnint cun l'Elena Vesnina 2-6 1-6. Cun i punt muciâ sù la riva par la prima vòlta a 'l 25śum pòst dal ranking.

• (EN) La sò schéda in sal sit dla WTA