Sofia Arvidsson

La Lena Sofia Alexandra Arvidsson (Halmstad, 16 ad Favràr dal 1984) l'è na tenìsta śvedéśa prufesiunìsta da 'l 1999. Sò pàdar al fà al pulisiòt, sò màdar l'insgnànta 'd piàṅ.

La dróa al bras dèstar e la tira 'l arvèrs a dū maṅ. L'è élta 176 cm e la péśa 69 chilo. Al cantànt ch'a gh piàś da piò 'l è Bruce Springsteen.

In dla sò caréra l'à vins dū tìtui WTA e daśdòt ad qvéi ITF. L'è stata bòna ad rivàr a èsar la nùmar vint-nóṿ dal mónd al 12 ad Setémbar dal 2006.

In d'l Avrìl dal 2002 la pèrd i sò dū singulàr ad Fed Cup śugâ in Itâglia cóntar la mudnéśa Adriana Serra Zanetti e la Roberta Vinci. In Maǵ però la s cava la sudisfasiòṅ ad rivàr in finàl in d'l ITF 'd Edinbûrg, pasànd p'r al qualificasiòṅ, baténd a 'l prim tùran la Marion Bartoli e pardénd in ùltim da la Barbora Záhlavová-Strýcová 6-4 4-6 6-7.

In dal 2003 la pèrd la finàl d'l ITF 'd Urtiśèi (6-2 2-6 2-6 da la Mara Santangelo) e la semifinàl ad qvél ad Turèṅ (3-6 5-7 da la Kaia Kanepi) ma la fà suo al turnèo ad Jersey (7-6 6-2 a la Sybille Bammer). In Utóbar la śōga dū WTA in Lussembûrg e a Quebec City, rivànd a 'l secónd tùran pardénd pò da la Marion Bartoli e da la Marija Šarapova. La finìs 'l àn vinsénd dū ITF e piasànd-as a 'l 113śum pòst.

In dal Favràr dal 2004 la bèca la Galina Voskoboeva a 'l prim tùran ad Memphis e la gh pèrd 6-7 7-6 1-6. Stés quèl anc a Vancouver: a càmbia sōl al puntéǵ, 2-6 4-6. A la fiṅ d'l an la riva in finàl in d'l ITF ad Pittsburgh (baténd, fra gl'atri, la nùmar òṅ dal tablòṅ Samantha Stosur 6-2 7-5) ma pò la pèrd 2-6 1-6 da la Shenay Perry.

In dal 2005 la pasa al qualificasiòṅ dal Roland Garros ma la s férma a 'l secónd tùran incruśand la rusa Svetlana Kuznecova ch'la la bat 6-3 6-4. La i pasa anc a Wimbledon (lasànd par strada sōi sèt śōg in tri incóntar) e a Lóndra la pasa 'l prim tùran prima ad cédar a l'Antonella Serra Zanetti par 5-7 6-2 5-7. In d'l ITF ad Petange la cata na śóvna Viktoryja Azaranka ch'la gh'à la méj sèg in di quàrt par 7-5 7-6. In Utóbar la riva in di quàrt anc a Tokyo (6-2 3-6 2-6 da la céca Nicole Vaidišová). A Linz invéci la bat la Barbora Záhlavová-Strýcová prima ad lasàr strada a la Nadia Petrova par 3-6 3-6. In Nuvémbar la śōga la sò prima finàla WTA a Quebec City ma la la pèrd 1-6 6-7 da l'Amy Frazier. La finìs 'l an da nùmar ssanta-sèt dal mónd.

A gl'Australian Open dal 2006 l'è bòna ad bàtar la Dinara Safina prima ad cédar a 'l tèrs tùran a cl'atra rusa Anastasija Myskina. In Favràr la vins al tìtul a Memphis pigànd in finàl la Marta Domachowska par 6-2 2-6 6-3 (e in di quàrt na śóvna Caroline Wozniacki). A Miami la s férma a 'l quàrt tùran (7-6 3-6 2-6 da l'Ai Sugiyama). A Róma in Maǵ la ciàpa la paga (da nùmar trénta dal mónd) da la Roberta Vinci 6-2 6-1. In Agóst a Stucólma la pèrd incóra (par la quàrta vòlta ad fila) in semifinàl da l'Anastasija Myskina 2-6 4-6. La finìs mâl 'l an suo più bèl miténd in fila sōl di prim e di secónd tùran.

Prima ad vìnsar in dal Favràr dal 2007 'l IFT ad St. Paul, la pèrd quàtar vòlti a 'l prim tùran, a Hobart a òpra dla Serena Williams. Andànd fóra in di quàrt a Memphis la cróda śò in clasìfica, da 'd là da 'l sentéśum pòst. La pasa 'l qualificasiòṅ a 'l Roland Garros (ma la pèrd subìt da l'Ana Ivanović 2-6 0-6) ma minga a Wimbledon (6-7 4-6 da la Stéphanie Foretz Gacon). In Luj la s mét in bisàca al tìtul ITF ad Båstad (baténd però sōl dal śugadōri misi pèś dal 280śum pòst). In Utóbar la vins àtar dū ITF a Joue-Les-Tours e a Glasgow.

La taca bèṅ asè al 2008 baténd 6-1 7-5 l'Elena Dement'eva (nùmar ùndas dal mónd) a Sydney, 6-7 6-4 6-3 la Marion Bartoli (nùmar déś) a gl'Australian Open e 6-3 7-5 l'Anna Čakvetadze (nùmar siē) a Antwerp. La riva pò in di quàrt a Memphis (6-3 1-6 3-6 da la Shahar Peer). In Utóbar la pasa al qualificasiòṅ a Śurîg pigànd via via la Petra Martić, la Shuai Peng e l'Iveta Benešová. Dòp avér mandâ a cà anc la Sybille Bammer, la s férma a 'l secónd tùran p'r òpra dla Petra Kvitová ch'la gh lasa sōl tri śōg. In cal méś lè la śōga àtar dū turnèo WTA ma la pèrd subìt in Lussembûrg (6-2 3-6 4-6 da la Sabine Lisicki) e a Quebec City (3-6 2-6 da la Voskoboeva, cun la Galina che sèg la pōl alvàr sèmpar la crésta esénd 5-1 in di cunfrònt dirèt, la sò bistiàsa négra). La śvedéśa la finìs 'l an rivànd in finàl in d'l ITF 'd Udénse, pardénd 2-6 1-6 da la padròna ad cà Caroline Wozniacki ma baténd in di tùran precedènt prima l'Andrea Petković e pò anc cl'atra tedésca, l'Angelique Kerber.

'L inìsi dal 2009 par lē l'è 'n diśàstar: siē prim tùran ad fila. La s tira 'n pò sù vinsénd in Setémbar 'l ITF ad Saguenay e in Utóbar qvél ad Joue-Les-Tours (baténd incóra l'Angelique Kerber e la Jelena Dokić in finàl 6-2 7-6). In Nuvémbar la fà suo anc 'l ITF ad Poitiers baténd incóra l'austragliàna in finàl 6-4 6-4 e via via anc la Mandy Minella e la Jaroslava Švedova in di utàṿ par 7-5 6-1.

In dal 2010 la śōga n'atra finàl a Memphis ma 'sta vòlta la pèrd da la Marija Šarapova 2-6 1-6. A Miami la riva a 'l secónd tùran baténd l'Alberta Brianti 6-2 6-4 ma pardénd séc da la Dominika Cibulková par 0-6 2-6. A gl'US Open la dà la paga a la Sorana Cîrstea 6-1 6-2 prima ad cédar a cl'atra ruména, l'Alexandra Dulgheru 6-7 1-6. In Utóbar la gh'à da pigàr-as a la Roberta Vinci a Linz e in Lussembûrg. L'ardópia però al tìtul a Poiters baténd la Petra Kvitová in semifinàl e la Pauline Parmentier in finàl.

In dal 2011 la pèrd subìt a Melbourne (1-6 5-7 da la Na Li), a Memphis (3-6 1-6 da l'Alexandra Stevenson) e a Miami (1-6 4-6 da la Bethanie Mattek-Sands), però la bat par dū vòlti l'Alizé Cornet a Parì e a Charleston. A Madrid la fà arbasàr la crésta a la Sloane Stephens in dal qualificasiòṅ ma a 'l secónd tùran la gh'à da magnàr la pólvra cóntar la Viktoryja Azaranka. A Bruxelles la bat la Coco Vandeweghe 6-3 7-6 e la Jelena Janković 3-6 6-3 6-3 prima ad lasàr strada in di quàrt a la Shuai Peng par 2-6 4-6. A Wimbledon la gh và mâl cun la Nastas'sja Jakimava (6-4 2-6 1-6). A Båstad la s imprufìta dal bandòṅ dla Caroline Wozniacki par rivàr in semifinàl (3-6 1-6 da la Johanna Larsson). A Cincinnati la bat incóra l'Alizé Cornet in dal qualificasiòṅ par pò pèrdar a 'l secónd tùran da l'Andrea Petković. Gl'US Open i gh vànan mâl (prim tùran cun la Samantha Stosur) acsè cuma 'l turnèo ad Quebec City in dua la riva a 'l secónd tùran baténd l'Elena Bovina ma pò la pèrd da l'Heather Watson par 5-7 3-6. A Pechîn la bat incóra la Petra Kvitová ma pò la lasa strada a l'Agnieszka Radwańska a 'l tèrs tùran. In Utóbar la pèrd la finàl d'l ITF ad Limoges cóntar la Sorana Cîrstea 2-6 2-6.

In dal 2012 a Sydney la bat in d'l ùltim tùran dal qualificasiòṅ l'Alexandra Dulgheru par 6-7 7-6 7-5 ma pò la s la cata incóra cóntar cuma pardénta furtunàda in dal prim tùran dal tablòṅ prinsipàl e 'sta vòlta la gh'à la méj la ruména 6-1 6-1. La śvedéśa la s tira sù in Favràr vinsénd par la secónda vòlta al tìtul ad Memphis (6-3 7-5 a la parmśàna Alberta Brianti in semifinàl e pò 6-3 6-4 a la Marina Eraković). A Acapûlc invéci la pèrd a 'l secónd tùran da la Flavia Pennetta ch'la la bat 2-6 7-6 6-1. In Maǵ la Sofia la s fà strada a Bruxelles baténd la Shuai Peng 7-5 6-3, l'Arantxa Rus 6-2 3-1 bandòṅ e l'Urszula Radwańska. La pèrd però la semifinàl da la Simona Halep par 4-6 3-6. A 'l Roland Garros la bat subìt la Roberta Vinci par 6-2 4-6 6-3 par pò èsar asfaltàda da la Jaroslava Švedova 1-6 0-6. A 'S-Hertogenbosch l'è bòna ad far fóra la Jelena Janković e incóra l'Arantxa Rus prima ad cédar a l'Urszula Radwańska 2-6 6-7. A Wimbledon la và a cà subìt par maṅ dl'Anastasija Pavljučenkova (1-6 2-6 al puntéǵ). A Båstad la gh'à raśòṅ dla Roberta Vinci e dl'Arantxa Rus, sèmpar par 6-4 7-5, ma in di quàrt la gh'à 'd alvàr la bandéra biànca cóntar la Mona Barthel. Dòp soquànt prim e secónd tùran, la riva in di quàrt a Linz (1-6 4-6 da la Julia Görges) e in semifinàl a Mósca in dua la bat facilmènt la Bojana Jovanovski, la Marion Bartoli e la Marija Kirilenko prima ad pèrdar in tri sét da la Caroline Wozniacki 3-6 7-6 4-6.

In dal 2013 la bat a cà sua la Samantha Stosur a Brisbane ma a 'l secónd tùran la pèrd da la Sloane Stephens. A Memphis e a Indian Wells la riva incóra a 'l secónd tùran, pardénd da la Marina Eraković e da la Julia Görges. Dòp avér batû la Sloane Stephens in Fed Cup e avér ciapâ la paga da la Serena Williams, la fà sù tri prim tùran a Esturìl (3-6 4-6 da la Galina Voskoboeva), a Madrid (3-6 1-6 da la Sabine Lisicki) e a Bruxelles (3-6 0-6 da la Shuai Peng).

• (EN) Al sò sit uficiàl
• (EN) La sò schéda in sal sit dla WTA