Virginie Razzano

La Virginie Razzano (Digiòṅ, 12 ad Maǵ dal 1983) l'è na tenìsta francéśa prufesiunìsta da 'l 1999 ch'l'è stada la nùmar sédas dal mónd in singulàr al 14 ad Setémbar dal 2009. La s è stablìda a Nîmes.

L'è élta 174 cm e la péśa 67 chilo. La dróa al bras dèstar e la tira 'l arvèrs a dū maṅ. Al film ch'la preferìs 'l è Il sesto senso.

In dla sò caréra l'à vins dū tìtui WTA (pardénd-an quàtar) e sinc ad qvéi ITF. L'è stada bòna ad rivàr in di utàṿ a gl'US Open (in dal 2006), a gl'Australian Open e a 'l Roland Garros (in dal 2009).

La francéśa la śōga la sò prima finàla WTA al 17 'd Utóbar dal 2004 a Taškent ma la la pèrd cun la Nicole Vaidišová par 7-5 3-6 2-6.

In dal 2007 la Razzano la s pòrta a cà finalmènt, in dal gir dna stmana, i sò prim dū tìtui WTA dla caréra a Cantón (6-0 6-3 a la Tzipora Obziler) e a Tokyo (4-6 7-6 6-4 a la Venus Williams). In d'l an la riva anc in di quàrt a Auckland (in dua la gh'à da bandunàr cun la Vera Zvonarëva in sal puntéǵ ad 5-7 0-2), a Los Angeles (7-6 4-6 1-6 da la Nadia Petrova) e a Turònt (5-7 2-6 da la Jelena Janković), in semifinàl a Barcelóna e in finàl a Forest Hills (2-6 2-6 da la Gisela Dulko), ma la fà sù anc di prim tùran a Indian Wells, Esturìl (6-7 5-7 da la Viktoryja Azaranka), Fès e Roland Garros (muciànd sù dū scòpli da la venesuelàna Milagros Sequera), Wimbledon (4-6 5-7 da l'Yvonne Meusburger) e Palèrum (in dua la ciàpa na patnàda 'd arcurdàr da la Sara Errani, 2-6 0-6).

Dòp un 2008 sóta tòṅ (la riva in di quàrt sōl a Amelia Island), in dal 2009 la Virginie la śōga la semifinàl a Hobart cun la Petra Kvitová (6-4 6-2 al puntéǵ par la céca) e la finàl dal turnèo dal Dubai miténd in riga la Kateryna Bondarenko 7-5 6-2, la Dinara Safina 6-4 6-2, la Daniela Hantuchová 6-2 1-6 6-2, la Vera Zvonarëva 7-6 7-5 e la Kaia Kanepi 6-1 6-2. La pèrd pò cun la Venus Williams 4-6 2-6. La francéśa la riva in séguit in di quàrt a Charleston (2-6 0-6 da la Caroline Wozniacki) e in di utàṿ a 'l Roland Garros (1-6 2-6 da la Samantha Stosur). In Luj la bat quàtar dal primi vint-a-dū śugadōri dal mónd a Eastbourne (l'Alizé Cornet, l'Elena Dement'eva, l'Agnieszka Radwańska e la Marion Bartoli) ma pò la céd in finàl a la Caroline Wozniacki 6-7 5-7. A Wimbledon la và fóra in di utàṿ cun la Francesca Schiavone par 2-6 6-7 mént'r a Turònt e a New Haven la pèrd a 'l tèrs tùran da la Samantha Stosur e da la Caroline Wozniacki, la sò bistiàsa négra (sèg l'è 0-5 in di cunfrònt dirèt).

In dal 2010 la śōga na finàl ITF a Vancouver pardénd-la cun la Jelena Dokić 1-6 4-6 e pò pôc àtar. In dal 2011, dòp un secónd tùran pardû cun la Na Li a Sydney, la śōga sinc pardìdi ad fila cun dal rusi. A gl'Australian Open la bat subìt l'Elena Vesnina 4-6 6-3 6-3 par pò pèrdar cun la Marija Šarapova 6-7 3-6. In Fed Cup la Razzano la bat invéci la siberiàna 6-3 6-4 ma la gh'à da pigàr-as cun la Svetlana Kuznecova 4-6 4-6. In dal turnèo ad Parì a 'l quèrt pò la và fóra subìt cun la Nadia Petrova par 1-6 3-6. In Avrìl la cata la Roberta Vinci in di quàrt a Barcelóna e la gh pèrd par 4-6 1-6. In Agóst la bat la Lucie Hradecká e la Marina Eraković a Carlsbad ma minga l'Andrea Petković, anc par via 'd un bandòṅ da part sua. La finìs 'l an cun gl'utàṿ a Pechîn (6-4 1-6 2-6 da la Monica Niculescu), un prim tùran in Lussembûrgh (6-7 4-6 da l'Ana Ivanović) e un secónd tùran in d'l ITF ad Poitiers (4-6 4-6 da la scuséśa Elena Baltača).

Dòp un 2012 da schiva, in dua la fà sù quàtar prim tùran fra turnèo WTA e ITF, tri mancàdi qualificasiòṅ e dū secónd tùran, in Maǵ l'è invéci bòna ad far fóra (da nùmar 111 dal mónd) la Serena Williams in dal prim tùran dal Roland Garros dòp èsar stada sóta 4-6 1-5, vinsénd pò par 4-6 7-6 6-3. L'americàna la n iva mai pardû subìt in un turnèo major prima 'd adès ma la francéśa la n mét mia a frut cal quèl lè parchè la và a pèrdar pò cun l'ulandéśa Arantxa Rus (nùmar utànt'òt dal mónd) in dal tùr'n a vgnir par 3-6 6-7. P'r al rèst d'l an, gnint in tut. Crudàda śò a la fiṅ d'l an a la puśisiòṅ sènt-a-ssantanóṿ, la francéśa la riva in semifinàl in d'l ITF ad Nantes ma la la pèrd però cun la Monica Niculescu par 6-3 3-6 2-6.

In dal 2013 la sò śliciàda a péś mòrt la cuntìnua in fiṅ a tucàr dagnóra 'l 200śum pòst e purtàr a cà un ITF da déś-mila dòlar a Amiens a n è minga asè par farmàr al sò strabùc. La s tira sù un pôc cun al tèrs tùran a 'l Roland Garros, śugâ par via dna carta salvàdga, in dua la pèrd da l'Ana Ivanović par 3-6 2-6. In Luj la riva in di quàrt a Båstad ma in Śvèsia la patìs na scòpla da la Flavia Pennetta ch'la la manda a cà cun un 1-6 3-6 in sal cupét. Qvéi ad Carlsbad i gh dànan n'ucaśiòṅ śibénd-ag na carta salvàdga e lē la la mét a frut baténd la Svetlana Kuznecova 6-2 6-4, la Carla Suárez Navarro 6-1 6-4 e la Petra Kvitová 6-7 7-5 7-6 in tri óri e quarànta minùt ad śōg. In semifinàl però la gh'à da pigàr-as a la Samantha Stosur par 6-7 3-6.

• (EN) La sò schéda in sal sit dla WTA