Desnitrifikazio

Desnitrifikazioa nitrogeno organikoaren (NO₃^-) erredukzioan datza, nitrogeno gasa (N₂) sortzeko. Bakterio batzuek (Pseudomonas, Thiobacillus...) besterik ez dute desnitrifikazio biologikoa burutzen: arnasketa anaerobioa egiten dutenean nitratoa elektroien azken hartzaile gisa erabiltzen dute.

Desnitrifikazioa honako ekuazio honetan labur daiteke:

2NO₃^- + 10e^- + 12H⁺ → N₂ + 6H₂O

Tarteko produktuak hauek izanik:

NO₃^- → NO₂^- → NO → N₂O → N₂ gas

Nitratoa arnasketa anaerobioan erabiltzerakoan nitritoak (NO₂^-) agertzen dira lehen. Nitritoak erreduzitzerakoan nitrogeno gasa sortzen da gero. Nitritoak oso toxikoak dira, eta haien pilaketa arriskutsua da; hori dela eta, desnitrifikazioa osatu behar da nitrito-pilaketa hori ekiditeko.

Desnitrifikazioa kaltegarria da nekazaritzan, lurzoruen nitratoak galtzen direlako. Hala ere, zenbait kasutan onuragarria izan daiteke; esaterako, ur-hondakinen tratamenduan, urak dituen nitratoak ezabatzeko (nitrato horiek eutrofizazioa eta algen hazkuntza eragiten baitute)

Desnitrifikazioak nitrogenoa lurretik atmosferara eramaten du. Alderantzizko bidea nitrogenoaren finkapenaren bidez gertatzen da.