Chewbacca

Chewbacca personaazje út Star Wars
persoanlike bysûnderheden
sekse	manlik
soarte personaazje	Wookiee
nasjonaliteit	Galaktysk
berop/amt	smokkelder, rebel
oare ynformaasje
besibbe   personaazjes	Han Solo prinsesse Leia Luke Skywalker
attributen	Millennium Falcon
geastlike heit	George Lucas
ûntstean	1976

Chewbacca (útspr.: [ʧuːˈbɑːkɑ], likernôch: "tsjûû-baa-ka", byneamd Chewie (útspr.: [ˈʧuːwi], likernôch: "tsjûû-y"), is in ferneamd fiktyf personaazje út 'e Star Wars-franchise, dat mids 1970-er jierren betocht waard troch de Amerikaanske filmmakker George Lucas. Hy is in twahûndert jier âlde, bûtenierdske Wookiee fan 'e planeet Kashyyyk. Yn 'e franchise is er in smokkelder en de ko-piloat fan Han Solo yn it romteskip de Millennium Falcon. Mei syn freon Han jout Chewbacca him by it Rebelleferbûn tsjin it skrikbewâld fan it Galaktysk Keizerryk, "lang ferlyn yn in stjerrestelsel fier, fier fuort".

Chewbacca makke it alderearst syn opwachting yn Star Wars: From the Adventures of Luke Skywalker, de ferboeking fan 'e earste Star Wars-film, dy't yn 1976 útkaam, in jier foàr de film. Hy is lykwols it bekendst út 'e oarspronklike Star Wars-filmtrilogy (1977-1983), wêryn't er spile waard troch akteur Peter Mayhew. Krapoan fjirtich jier letter dielde Mayhew deselde rol yn 'e film Star Wars: Episode VII – The Force Awakens (2015) mei Joonas Suotamo. Yn 'e oare dielen fan 'e Star Wars-ferfolchtrilogy en de spin-off-film Solo: A Star Wars Story (2018) naam Suotamo de rol hielendal oer.