Back ميتوسوم Arabic Мітасома Byelorussian Mitosoma Catalan Mitozom Czech Mitosom German Mitosome English Mitosoma Spanish Mitosome French Mitoszóma Hungarian Mitosom ID

Mitosoma

O mitosoma é un orgánulo atopado nalgúns organismos eucariotas unicelulares. O mitosoma foi descuberto e nomeado moi recentemente,[1] e a súa función aínda non está ben caracterizada. Foi denominado tamén crypton, mais ese nome xa non se usa.

O mitosoma detectouse só en organismos anaeróbicos ou microaerófilos que non teñen mitocondrias. Estes organismos non teñen a capacidade de obter enerxía da fosforilación oxidativa, como se realizaría normalmente nas mitocondrias. O mitosoma foi descrito primeiro en Entamoeba histolytica, un parasito intestinal humano.[1][2] Os mitosomas tamén foron identificados en varias especies de microsporidios[3][4] e en Giardia intestinalis.[5]

Os mitosomas derivan con case toda seguridade das mitocondrias. Igual que as mitocondrias, teñen dobre membrana e a maioría das proteínas que son transportadas a eles teñen unha secuencia de sinalización de aminoácidos.[1][3][4] Dita secuencia de aminoácidos é similar á que usan as mitocondrias e as auténticas presecuencias mitocondriais poden servir para transportar proteínas aos mitosomas.[1] Demostrouse ademais que un certo número de proteínas asociadas a mitosomas están estreitamente relacionadas coas da mitocondria[2] ou coas dos hidroxenosomas (os cales son tamén mitocondrias dexeneradas).[6]

Sábese actualmente que os mitosomas probablemente interveñen na ensamblaxe de grupos ferro-sulfurados de proteínas, xa que non presentan as proteínas mitocondriais para a respiración celular ou a síntese do grupo hemo pero si as proteínas requiridas para a biosíntese de grupos Fe-S, como frataxina, cisteína desulfurase, Isu1 e unha Hsp70 mitocondrial.[4]

A diferenza das mitocondrias, os mitosomas non teñen xenes no seu interior. Os xenes que codifican os compoñentes mitosómicos están contidos no xenoma nuclear.[1] Un informe inicial suxería a presenza de ADN neste orgánulo,[7] pero investigacións máis recentes demostraron que carecen del.[8]

  1. ↑ 1,0 1,1 1,2 1,3 1,4 Tovar J, Fischer A, Clark CG. (1999). "The mitosome, a novel organelle related to mitochondria in the amitochondrial parasite Entamoeba histolytica". Molecular microbiology 32 (5): 1013–21. PMID 10361303. doi:10.1046/j.1365-2958.1999.01414.x. 
  2. ↑ 2,0 2,1 Bakatselou C, Beste D, Kadri AO, Somanath S, Clark CG. (2003). "Analysis of genes of mitochondrial origin in the genus Entamoeba". The Journal of eukaryotic microbiology 50 (3): 210–4. PMID 12836878. doi:10.1111/j.1550-7408.2003.tb00119.x. 
  3. ↑ 3,0 3,1 Williams BA, Hirt RP, Lucocq JM, Embley TM. (2002). "A mitochondrial remnant in the microsporidian Trachipleistophora hominis". Nature 418 (6900): 865–9. PMID 12192407. doi:10.1038/nature00949. 
  4. ↑ 4,0 4,1 4,2 Goldberg AV, Molik S, Tsaousis AD, Neumann K, Kuhnke G, Delbac F, Vivares CP, Hirt RP, Lill R, Embley TM. (2008). "Localization and functionality of microsporidian iron–sulphur cluster assembly proteins". Nature 452 (7187): 624. PMID 18311129. doi:10.1038/nature06606. 
  5. ↑ Tovar J, León-Avila G, Sánchez LB, Sutak R, Tachezy J, van der Giezen M, Hernández M, Müller M, Lucocq JM. (2003). "Mitochondrial remnant organelles of Giardia function in iron-sulphur protein maturation". Nature 426 (6963): 172. PMID 14614504. doi:10.1038/nature01945. 
  6. ↑ Dolezal P, Smíd O, Rada P, Zubácová Z, Bursać D, Suták R, Nebesárová J, Lithgow T, Tachezy J. (2005). "Giardia mitosomes and trichomonad hydrogenosomes share a common mode of protein targeting". Proceedings of the National Academy of Sciences of the United States of America 102 (31): 10924–9. PMC 1182405. PMID 16040811. doi:10.1073/pnas.0500349102. 
  7. ↑ Ghosh S, Field J, Rogers R, Hickman M, Samuelson J. (2000). "The Entamoeba histolytica Mitochondrion-Derived Organelle (Crypton) Contains Double-Stranded DNA and Appears to Be Bound by a Double Membrane". Infection and Immunity 68 (7): 4319. PMC 101756. PMID 10858251. doi:10.1128/IAI.68.7.4319-4322.2000. 
  8. ↑ León-Avila, G; Tovar, J. (2004). "Mitosomes of Entamoeba histolytica are abundant mitochondrion-related remnant organelles that lack a detectable organellar genome". Microbiology 150 (Pt 5): 1245. PMID 15133087. doi:10.1099/mic.0.26923-0. 

Developed by StudentB