Esch-Uelzecht

Esch-Uelzecht
Aussprooch
An anere Sproochen	fr: Esch-sur-Alzette de: Esch-an-der-Alzette
Land	Lëtzebuerg
Kanton	Kanton Esch-Uelzecht
Buergermeeschter	Christian Weis (CSV)
Awunner	37.455
	1. Januar 2024
Fläch	1.435 ha
Héicht	279 m
Koordinaten	49° 29’ 49’’ N       05° 58’ 50’’ O
LAU-Code	LU0204
Websäit	http://www.esch.lu

Vue op Esch ëm 1600, vum Dipbechdall (Wobrécken) aus

Esch-Uelzecht, 1860. Déi al Kierch St. Jean stoung do, wou haut d'Groussgaassschoul ass

De Krounprënz Wilhelm von Preußen, 1914, virun der Groussgaassschoul

Bebauungsplang vum Joseph Stübben, 1924-25 (spéider nëmmen zum Deel ëmgesat).

Esch-Uelzecht ass eng vun den 100 Gemengen an eng vun den 12 Stied am Groussherzogtum Lëtzebuerg a Chef-lieu vum Kanton mam selwechten Numm. Et gëtt keng aner Uertschaften an der Gemeng. Mat 37.455 Awunner (1. Januar 2024) ass Esch déi zweetgréisst Stad vum Land.

Laang en einfacht Bauerendierfchen, am Dall vun der Uelzecht, huet Esch mat der Entdeckung vun der Minett (ëm 1870), an der domat verbonnener Entwécklung vun de Minièren, der Eisen- a Stolindustrie, bannent e puer Joerzéngte seng Populatioun verzéngfacht. D'Strukturkris an deem Secteur, déi Mëtt der 1970er Joren ausgebrach ass, huet et mat sech bruecht, datt no an no all Minièren an e groussen Deel vun de Schmelzen zougemaach hunn.

Déi doduerch entstanen Industriebrooche sinn zum Deel am Gaang, nei bebaut ze ginn. Sou ginn a goufen zanter 2005 op Belval nei administrativ, kulturell an edukativ Gebaier, mä och Wunnengen, Büroen a Geschäfter gebaut. An den 2020er Jore soll den Terrain vun der fréierer Schëfflenger Schmelz nei strukturéiert a bebaut ginn, an um fréiere Site vu Terres-Rouges soll virun allem Wunnraum geschafe ginn.

Den 10. November 2017 gouf Esch vum Europäesche Conseil, op Recommandatioun vum zoustännege Comité, zesumme mam litauesche Kaunas, zur Europäescher Kulturhaaptstad 2022 ausgewielt. Och déi 10 Gemenge vum Gemengesyndikat PRO-SUD an déi vum Pays-Haut Val d'Alzette, déi Säit der Grenz, solle matmaachen.^[1],[2],[3]

1. ↑ Esch wird Kulturhauptstadt. tageblatt.lu, 10. November 2017.
2. ↑ Esch/Alzette wird Kulturhauptstadt Europas. lessentiel.lu, 10. November 2017
3. ↑ "Decisioun gefall: Esch gëtt Kulturhaaptstad 2022." rtl.lu, 10.11.2017 / Video, 00:01:59.