Parang Salib

Parang Salib (bahaso Latin: Expeditio Sacra, Jalajah Suci) iolah sarangkaian parang agamo nan didukuang Gareja Latin pado Abaik Patangahan. Manuruik pandangan umum, parang Salib iolah istilah untuak parang-parang di kawasan timur Lauik Tangah nan batujuan marabuik baliak Tanah Suci dari kakuasoan Islam, namun sabananyo istilah "parang Salib" ko digunoan pulo untuak parang-parang nan direstui Gareja di kawasan-kawasan lain. Parang Salib manjadi-jadi dek karano baragam alasan, baiak untuak mambaranguih panyambahan barhalo jo ajaran sasek, untuak manyalasaian patikaian di antaro pihak-pihak nan samo-samo baragamo Kristen Katolik, ataupun untuak mancapai tujuan-tujuan politik jo panguasoan wilayah. Katiko partamo kali bakobar, parang-parang samacam ko alun disabuik "Parang Salib". Istilah "Parang Salib" baru tanamo sajak taun 1760 Masehi.

Pado 1095 Masehi, Paus Urbanus II maajak dunia Kristen untuak mangobarkan parang Salib Partamo dalam khutbahnyo pado Konsili Clermont. Liau maimbau sadolah hadirin untuak manyiapkan pasukan untuak manolong Kakaisaran Bizantium jo Kaisar Bizantium, Aleksios I, nan sangkek tu paralu tambahan pasukan guno untuak malawan urang-urang Turki nan alah bamigrasi ka barat dan alah manjajah Anatolia. Salah satu niaik nan ka dituju dek Sri Paus ioalah tajaminnyo kabebasan jo kaamanan paziarah-paziarah Kristen untuak baziarah ka tampek-tampek suci agamo Kristen di kawasan timur Lauik Tangah nan alah ditampeki kaum Muslim, namun ahli-ahli sijarah indak sapandapaik jo apokah jaminan akses bagi paziarah ko adolah motif utamo dari Sri Paus surang ataukah motif utamo dari pihak-pihak nan mananggapi imbauannyo. Mungkin sajo Sri Paus sabananyo baniaik untuak mampasatukan baliak balahan Timur jo balahan Baraik Dunia Kristen nan tapisah samanjak tajadinyo Skisma Timur-Barat pado 1054, sarato manjadikan dirinyo surang manjadi pamimpin tungga Gareja. Kamanangan partamo nan diraiah bala tantara Kristen dalam parang Salib babuah tagaknyo ampek Nagara Tantara Salib nan partamo di kawasan timur Lauik Tangah, yakni Kabupaten Edessa, Kepangeranan Antiokhia, Karajaan Yerusalem, dan Kabupaten Tripoli. Tanggapan nan sabana basumangaik dek imbauan Paus Urbanus dari sadonyo kalangan masyarakaik Eropa Baraik manjadi pangka bala bagi parang-parang Salib salanjuiknyo. Urang ramai manjadi sukarelawan tantara Gajera baarok ka diangkek basamo-samo ka sarugo dari Yerusalem atau mandapek ampunan dari Allah ateh sagalo dosonyo, samantaro sukarelawan nan lain turuik sarato manjadi Tantara Salib untuak mangarajoan kawajiban feodal, untuak kamuliaan jo kahoromatan, atau untuak kauntungan ekonomi dan politik.

Upayo duo abaik untuak mambebaskan Tanah Suci dari kaum Muslim barakhia jo kagagalan. Sasudah Parang Salib Partamo, masih bakobar anam Parang Salib gadang lai dan banyak parang Salib nan ketek-ketek. Sasudah benteng-benteng paliang muko Kristen Katolik nan tarakhia ditakaluakan pado 1291 Masehi, indak ado lai Parang Salib siap tu, tapi kauntuangan nan barasia dikumpuakan batahan labiah lamo di kawasan utara jo baraik Eropa. Parang Salib Wendi jo parang-parang salib nan dikobarkan dek Uskup Aguang Bremen barasia mampasatukan saluruah kawasan timur lauik Samananjuang Baltik sarato suku-suku di Mecklenburg dan Lausitz di bawah kandali pihak Kristen Katolik pado pangujuang abaik ka-12. Pado mulo abaik ka-13, Tarekaik Kasatria Teuton mandirikan sabuah Nagara Tantara Salib di Prusia dan monarki Parancih mamanfaatkan Parang Salib Albigensia untuak mampalaweh wilayah kuasoannyo sampai ka Lauik Tangah. Usaho-usaho Kasultanan Turki-Osmanli pado pangujuang abaik ka-14 ditanggapi pihak Kristen Katolik jo Parang-Parang Salib nan barakhia jo kakalahan bala Tantara Salib di Nikopolis pado 1396 jo di Varna pado 1444. Eropa di bawah kandali pihak Kristen Katolik tapuruak dalam kondisi kacau-balau, dan babak tarakhia dalam pasalisiahan Kristen–Islam ditandoi dek duo kajadian gadang: jatuahnyo Konstantinopel ka tangan Kasultanan Turki-Osmanli pado 1453, jo kamanangan akhia Spanyol dek bangso Moro jo takaluaknyo Granada pado 1492. Gagasan parang Salib taruih iduik, sakurang-kurangnyo dalam wujuik Tarekaik Kasatria Hospitalis, sampai akhia abaik ka-18, namun minat urang Eropa Barat alah baraliah ka Dunia Baru.

Ahli sijarah modern babeda pandapaik tantang Tantara Salib. Dek sabagian sijarawan, karajo-karajo Tantara Salib indak sajalan jo tujuan mulia nan samulo didanguang-danguangkan, dan indak sajalan jo kaputusan limbago kapausan salaku pandu akhlak Dunia Kristen, bak cando nan dibuktikan dek fakta baso Sri Paus adokalonyo manjatuahan hukuman pangucilan ka bakeh Tantara Salib. Bala Tantara Salib dalam pagarikannyo acokkali malakukan aksi panjarahan, dan pado umumnyo panglima-panglima Tantara Salib batahan manguasoi wilayah nan alah irabuik, aliah-aliah mambaliakannyo ka Kakaisaran Bizantium. Salamo bakobarnyo Parang Salib Rakyaik, ribuan urang Yahudi tabunuah dalam aksi sanga nan kini disabuik sabagai Kajadian Pambantaian Rheinland. Konstantinopel dijarah saabih tandeh salamo Parang Salib Kaampek. Walau baitu, parang Salib badampak banyak bagi paradaban Dunia Barat: parang-parang iko mambukak baliak parairan Lauik Tangah untuak kagiatan niago jo palayaran (mamungkinkan bakambangnyo Genova jo Venesia); mambangun jati diri Gareja Latin di bawah kapemimpinan Sri Paus; sarato manjadi sumber kisah-kisah kapahlawanan, parilaku kasatria, jo kasalehan nan manjiwai roman, filsafat, jo sastra abaik Patangahan. Parang Salib juo mampakukuah patalian antaro Dunia Kristen Barat, feodalisme, dan militerisme.