Automatic for the People

Automatic for the People er eit musikkalbum av den amerikanske musikkgruppa R.E.M. som vart utgjeve i 1992. Albumet fører vidare elementa frå folk-musikk, countryrock og klassisk pop som vart brukte i Green og Out of Time, men med færre element frå pop-en og ein generelt dystrare stemning. Bono i U2 har kalla det «den største countryplata som aldri vart laga».^[1]

Namnet på albumet viser til mottoet til etestaden «Weaver D’s Delicious Fine Foods» i Athens i Georgia. Biletet på framsida har ikkje noko med denne restauranten å gjere, det viser skiltet til eit motell i Miami, der delar av albumet vart spela inn, i gråtonar. Andre delar av albumet vart spela inn i New Orleans. John Paul Jones, bassisten i Led Zeppelin, arrangerte strenginstrumenta i «Drive», «The Sidewinder Sleeps Tonite», «Everybody Hurts» og «Nightswimming».

I 2005 gav Warner Bros. Records ut ei utgåve av Automatic for the People med to plater. Den eine var ei CD-plate, og den andre var ein lyd-DVD som inneheldt ei miksing av albumet som var gjort av Elliot Scheiner. Plata er den som er representert med flest songar (fire) på samleplata In Time: The Best of R.E.M. 1988-2003.

1. ↑ Handler, Shane: «R.E.M. Live» i Glide Magazine., arkivert frå originalen 25. oktober 2007, henta 26. august 2008