Heimskringla

Heimskringla, og kalla Norske kongesoger, er ei samling av kongesoger nedskriven kring 1220-talet av islendingen Snorre Sturlason (1179—1242).

Sogene byrjar med Ynglingesoga, soga om Ynglingeætta i Sverige (Svitjod). Etter kvart vert hovudsakleg norske kongar frå 900-talet til 1100-talet omtala. Sogene sluttar med at Øystein Øysteinsson Møyla døyr i 1177.

Namnet Heimskringla kjem av opningsorda i verket, «Kringla heimsins», den runde jordskiva. Heimskringla eller dei norske kongesogene har hatt mykje å seia for å skapa ei norsk nasjonalkjensle.

Heimskringla inneheld dei fylgjande sogene:

• Ynglingesoga
• Soga om Halvdan Svarte
• Soga om Harald Hårfagre (døydde om lag 931)
• Soga om Håkon den gode (døydde 961)
• Soga om Harald Gråfell (døydde 969)
• Soga om Olav Tryggvason (døydde 1000)
• Soga om Olav Haraldsson (døydde 1030)
• Soga om Magnus den gode (døydde 1047)
• Soga om Harald Hardråde (døydde 1066)
• Soga om Olav Kyrre (døydde 1093)
• Soga om Magnus Berrføtt (døydde 1103)
• Soga om Sigurd Jorsalfare (døydde 1130) og brørne hans
• Soga om Magnus den blinde (avsett 1135) og om Harald Gille (døydde 1136)
• Soga om Sigurd (døydde 1155), Øystein (døydde 1157) og Inge (døydde 1161), sønene til Harald Gille
• Soga om Håkon Herdebrei (døydde 1162)
• Soga om Magnus Erlingsson (døydde 1184)