House

Lo house o la musica house (en anglés: house music [ˈhaʊs ˌmjuːzɪk]) es un genre de musica electronica dançarèla, pertanhent fin finala a la granda familha del rock en estant un derivat dirècte del disco ("Ride on time" de Black Box, "The Only Way Is Up" de Yazz, "Theme from S-Express", "Please Don't Go" de Double You etc), mas retrabalhat amb un ritme minimal e amb de samples (escapolons) de voses o d'instruments. La house apareguèt capvath la synthpop e lo funk (lo disco tardiu) al començament dels ans 1980 dins las ciutats de la region nòrd dels Estats Units, Chicago (Lil' Louis), Detroit (Kevin Saunderson) e quitament Nòva York (Kraze), e mai precisament, segon la legenda, al club lo Warehouse de Chicago amb lo discjòquei Frankie Knuckles. Aquel genre a conegut un succès mondial entre 1987 e 1990 (MARRS, Snap!, Technotronic), puèi s'es mudat en tècno de caps 1991-1992 (U96, Felix, 2 Unlimited).

La house pr'aquò coneis ara un succès renovelat, se pòt veire per exemple un reviscòl de la house primitiva dins lo movement tecktonik en 2007-2008, amb per exemple Mondotek, succès amorçat dempuèi la fin dels ans 1990 amb per d'unes la causida artistica d'un retorn a la font de la musica electronica de las annadas 70. Aital, lo duò francés Daft Punk foguèt cap de fila emblematic de los de la scèna francesa French touch que causiguèron dins lo mitan de la musica electronica de s'aluenhar tre 1996 mai que mai de la tècno 90 eurodance per se tornar al disco e quitament de caps una synthpop primitiva coma la de Kraftwerk.

D'unes musicians de house se destacan per lor recèrca d'un son estetic e refinat, que crèa un ambient requist.